O pasado xoves tivemos xa a terceira reunión dos nosos clubs de lectura.
Na reunión do club infantil, coa axuda de "O meu pesadelo favorito" (de María Solar) falamos de pesadelos, dos nosos pesadelos favoritos e dos menos favoritos, e demos forma aos nosos propios monstros con botellas de plástico, cartolina de cores e fíos de la. Creamos a súa pequena historia, démoslle nome e monstrosos superpoderes.
No club adulto, Hrabal e a súa descarnada historia sobre o vello Hant'a e a súa prensa hidráulica na Praga da posguerra (en "Unha soidade demasiado ruidosa"), acompañados dunha breve selección de pezas dalgúns dos máis salientables compositores checos do século XIX e XX, servíronos de inspiración para unha interesante e moi colorida sesión de arteterapia colectiva. O resultado: un chulísimo mural cheo de cor e movemento.
Por se tamén vós vos animades dende a casa a experimentar coas emocións da música e a cor, deixámosvos aquí o enlace para a lista de reproducción aloxada en Spotify.
Agora, esperamos impacientes á seguinte data de xuntanza, na que indagaremos sobre o misteriosísismo misterio dos Papacalcetíns...
... e deixaremos que o noso nariz se sorprenda cos olores que Süskind crea e recrea para nós entre as páxinas do seu "O Perfume".
Para quen aínda non fixestes a vosa inscrición, sabede que podedes facelo cubrindo e entregando a folla cos vosos datos no Departamento de Cultura do Concello... Tamén, podedes escribirnos e consultarnos calquera dúbida ao noso correo lendo.aestrada@gmail.com .
Esperámosvos, logo, a todas e todos o próximo 14 de Abril na Casa das Letras!
Comentarios
Publicar un comentario